السبت، يونيو 21، 2008

تنويه هام بخصوص بياناتي

مش عارف ليه كل اللي يشوف رقم موبيلي في الموقع أو ايميلي يفهم اني عامله للبنات بس أو للتفاهة وبس. مع ان العكس صحيح تماما.
اولا: انا ليه مش خايف من الحكاية دي؟
لان انا اصلا رقمي موجود من زمان على النت. من أيام ما كنت عضو مشارك في مجموعة لينكس القاهرة وكنت محتاج كل الناس توصلي بسهولة. كنت بحط رقمي بعد كل دعوة للاجتماع عشان اللي ميعرفش يوصل يتصل على طول وساعات والله - أيام العز - كنت بتصل بكل رقم يرن لي كمان.
بالتالي انت لو عملت بخث عن رقم موبيلي على جوجل - - هتلاقيه على النت بقاله أكتر من 3 سنين، يعني الموضوع مش جديد عليا

ثانيا: انا فعلا حطيته لكل محتاج مساعدة
يمكن ناس تستغرب الكلام دا، لكن اللي عارفني بجد، عارفين اني عمري ما تأخرت على حد حتى لو معرفوش.
بجد انا ببقي فرحان لما حد يكلمني ويقولي
محتاج كذا أو كذا بتصرف على طول على قد ما أقدر.
يعني في موضوع كورسات الجامعة الامريكية اتصل بيا أكتر من 40 واحد منهم اللي كان بيشكر ومنهم اللي كان محتاج مساعدة بسيطة، وكنت دايما بعرض على اي حد اني أنسخله الاسطوانات بنفسي وأقابله بيها. يعني عبد الإله اتصل بيا من السعودية مخصوص يتاكد من الروابط ويشكرني. الموضوع دا كان بيفرحني جدا.
وأستاذ هيثم اللي اتصل بيا مخصوص عشان لقي اللينكات مش شغالة والحمد لله في خلال ساعتين كنت رفعتهم على رابط دائم مخصوص عشانه ومتاح للكل طبعا.
ومعتز طالب طب اللي بعتلي رسالة مخصوص يشكرني على الحلقات بتاعة معجزات في الرحم. والناس اللي بعتتلي رسايل الفجر كمان والله فرحت بيها جدا مع اني صحيت من النوم مخصوص.
واللي كلموني عشان اسطوانات الإندزاين العربي أو الكوارك بتاع الماكنتوش من قطر وبلاد أجنبية كمان وكان ليهم طلبات تانية حاولت أوفرها.
ومسلسل فريندز اللي عرفني على ناس كتيرة جد برضه وطلع منهم ناس معايا في الكلية بتاعتي!!!! ومعرفناش بعض الا على النت صدفة!
وكل اللي سألوا عن حاجة في موضوع برامج النوكيا الجيل الثالث والله رحبت بالكل
وكتير اتصلو عشان أفلام انا حاططها أو هما عاوزينها
وكورس تعليم الكمبيوتر كمان جابلي مكالمات كتير غلط، مش عشان انا مش عاوزها لا عشان هو مش بتاعي ووجهتهم كلهم للمهندس صاحب الكورس
واسطوانة ريدلر اللي اتفاجات انها انتشرت مع ناس اعرفهم نزلوها من النت من غير ما يعرفو ان أنا
محركات البحث برضه كان من المواضيع اللي خلت ناس كتير تتصل تسأل على معلومات أكتر ومعتقدش اتأخرت عليهم
موضوع ازاي تنتقم من الناس بجد دا اللي عمري ما هنساه لأسباب لا يعرفها إلا شخص واحد فقط. استقبلت برضه اتصالات كتير بسببه، وكان منها حاجات تودي في داهية!
مش هقدر اقول الكل طبعا لكن انا بس بقول أمثلة بس عشان الناس تفهم اكتر
وكمان انا فعلا عملت صداقات حلوة مع ناس فعلا كويسين عن طريق مساعدتهم ومازلت بقول انا دايما في الخدمة.

ثالثا: ليه بقي الناس فاكراني بلعب؟
يعني مثلا الشات بوكس اللي في الجمب لقيته فجاة مليان هو انت مرتبط وواحدة ترد وتقول لا مش مرتبط وواحدة تدخل وتقول مخطوب ولا لأ؟ هو عمر حد قرأ تحت توقيعي في أي منتدى كلمة الإضافة للبنات فقط؟ لا والله عمري.
الغريب ان في واحد انا فعلا زعلت منه اتصل بيا من ليبيا وغير صوته على أنه بنت عشان أساعده. ومش فاهم ليه عمل كدا؟ هو بس تخيل اني هساعده لما يكون بنت ولو راجل لأ؟ عيب والله. طبعا عملت له اللي هو عاوزه مع اني اتضايقت من الموقف نفسه.
الغريب ان كذا واحد برضه يفتكرو اني حاطط رقم بنت عاوز أأذيها على النت عشان اللي يدخل يتصل ويضايقها. كمان!!!!
دا رقمي يا جماعة وانا حطيته لكل اللي محتاجني: في شغل أو مساعدة.
ياريت يكون الموضوع واضح

وانا فعلا بعتز بكل اتصال أو مساعدة أقدر أقدمها لحد.

هناك 3 تعليقات:

  1. بصفتي واحدة من بين الذين استفادوا وهم كثر.... من المعلومات القيمة التي قدمتها من خلال موقعك هذا أظن انه من الطبيعي ان تنشر رقم هاتفك لتسهيل عملية التواصل بالنسبة للأشخاص الراغبين في تلقي المساعدة و المعرفة الجادة..نظرا لأنه لايمكن موافتك على النت في اي وقت ولك الشكر الجزيل على مجهوداتك أما ما عدا هؤلاء.. بصراحة يا أخ محمد أنا لا أرى من داع لكل هذا العناء ..عناء الشرح و التبرير لأناس ربما يأخذون الحياة بسطحية ...استمر و وواصل مسارك ما دامت الجدية هي شعارك أعانك الله...

    ردحذف
  2. ربنا يقدرك على عمل الخير وخليك واثق من نفسك ما تخليش حد يقلل من ثقتك لنفسك اللى بيفكر تفكير ده اكيد هو كده ففاكر ناس كلها ذيه ربنا يكرمك ويقدرك على مساعديت الغير

    ردحذف
  3. انا بشكرك كتير جدا لأني من من اكتر من يمكن 8 شهور حملت اسطوانة الانديزاين من عندك وبصراحة خدمتني كتير في الشغل بتاعي .. لأني كنت فعلا محتاجها .. وطبعا انا عارف اني متأخر جدا في الشكر بس معلهش .. وجت الفرصة عشان اقولك ان انا وانا شاب مثلك .. ويمكن اكبر منك في السن بقليل معجب جدا بكلامك وموضوعاتك .. وربنا يوفقك

    ردحذف

فضلا اترك تعليقك أو أكتب طلبك هنا، مع الحفاظ على أدب الحوار، واكتب اسمك من فضلك....