الجمعة، نوفمبر 10، 2006

Mobinil - ولا أم نبيل؟



بصراحة الشبكة بقت زي الزفت
دايمًا خطأ في الإتصال أو الشبكة مشغولة أو الصوت الغبي بتاع (توت توت توت)
بقت حاجة تقرف. نص المكالمات مبعرفش أعملها
يا إما يطوروا الشبكة عشان المستخدمين الجدد، يا إما يغيروا النشاط و يبيعوا فيشار
من شهر وشوية حصلت مشكلة مش حلوة
أنا كنت على نظام الو بالزفت - اللي هي الثانية، و حولت لنظام الوهات. المفروض أن نظام ألوهات بييجي عليه خدمة كليب بلس
و هي خدمة عشان لو حد اتصل بيك و الموبايل مقفول او مفيش شبكة - و غالبا مفيش شبكة - يبعتولك رسالة بالرقم و الساعة
النظام ده بييجي عليه الخدمة مجانا و للأنظمة التناية اشتراك 5 جنبيه
اللي عرفنى الحكاية ديه ان انا حاولت اشترك فيها فالولية بتاعة الكمبيوتر قالت لي ان الخدمة ملحفة مع نظام الوهات
!طب كويس ادخل على القائمة و اشغل الخدمة زي ما قالوا مفيش حاجة
!ادخل الموقع و امشي مع التعليمات- برضه مفيش حاجة
قلت يا واد مش خسارة مكالمة لخدمة العملاء 110. كلمتهم الموضوع كذا كذا
قاليي نفس الكلام الي ع الموقع، و عملته و قاللي قدامك 24 ساعة - ماشي
!!طبعا ما اشتغلتش
طلبتهم تاني - مع العلم أن سعر المكالمة كاملة 1.5 جنيه، مفيش مشكلة قالتلى حضرتنك كده شغال مظبوط و هنشغلها في خلال 24 ساعة
برضه ولا الهوا. اتصلت تاني بالنمرة ديه رد واحد باين عليه بيفهم - قاللى هرفع مشكلتك لرئيس القسم لأن كده فيه مشكلة في الخط. ارفع يا عم براحتك
بعدها بيومين اتصلت و حكيت للاستاذ اللي رد الحكاية كلها قاللي حنحل المشكلة و نتصل بحضرتك
طبعا لا المشكلة اتحلت ولا اتصلوا بيا. بعد كده حاولت للمرة الألف أني اشترك في الخدمة قالتلي عفوا رصيدك الحالي لا يسمح!!
طبعا الرصيد كان اتسحب كله مكالمات لخدمة العملا - الله يحرقهم - و في الآخر بعد القرف ده طلعوا عايزين اشتراك!
انتوا رأيكم ايه؟ أرمي الشريحة و أريح نفسي. و أريح الناس اللي بتتصل و متلاقيش الموبايل شغال؟

هناك تعليقان (2):

  1. لأ هيه أم نبيل

    ردحذف
  2. الموضوع فعلا بقى زبالة، و المصيبة ان كل بتوع خدمة العملاء بقوا بتوع اشتغال العملاء أو تثبيت العملاء

    ردحذف

فضلا اترك تعليقك أو أكتب طلبك هنا، مع الحفاظ على أدب الحوار، واكتب اسمك من فضلك....