طنطا ... كمان وكمان

لتاني مرة انزل طنطا بدون أي وجهة، لأسباب شخصية جدا معروفة جدا !!!!
نزلت برضه ومفيش في دماغي أي حاجة أو حتى حتة أروحها. بس نزلت واستنيت... المرة دي طولت اوي مش زي المرة اللي فاتت. المرة دي قعدت حبة هناك بدون مبرر أو يمكن في مبرر بس محدش يعرفه
استفدت ايه ؟؟ ولا أي حاجة. كل اللي حصل اني المرة دي بدل ما أمشي لحد ما طلعت عيني زي المرة اللي فاتت، قعدت على قهوة لأني كنت مستنى رد. فضلت قاعد كتير وكان باين عليا الزهق طبعا، فضلت أسأل عن مكان معين كتير اوي لحد ما واحد خد باله من كلامي مع القهوجي فسألني: انت أول مرة تنزل طنطا؟
قلت له لأ دي تاني مرة بس المرة اللي فاتت مطولتش يعني بس المرة دي مصر أوصل للمكان اللي أنا عاوزه
سألني: طيب روحت زرت سيدي البدوي؟
رديت اني معرفش مكانه أصلا ولا اعرف اذا كان قريب ولا بعيد
قالي: لأ مينفعش تنزل طنطا مرتين ومتزوروش خالص
قلت له وبدأت أزهق: بصراحة مش بصدق في الحاجت دي
اتنفض في قعدته وقالي: ازاي؟ متقولش كده
قلت إني مش بحب أتمسح في الاوليا. ربنا عمره ما كان بينه وبين العبد حجاب
قالي: بس الراجل بركاته معروفة ومينكرهاش أي حد
قلتله إني محبش ادخل ف المواضيع دي أوي يعني
قالي: طيب انت تعرف ايه عنه. أكيد في حاجة مخلياك تقول كده
فكرت شوية ورديت بالراحة - لأني كنت بحاول أرتب أفكاري، لأني معرفش كتير:
متنكرش ان في ناس بيقولو عنه انه كان نصاب ودجال تستر بالدين - نقطة ضعف المصريين - اللي بيعملوا من كل دجال شيخ ... قلت له كده وانا عمال أفتكر قريت الكلمتين دول فين عشان الراجل كان شكله هياكلني، مفتكرتش ... وده ميمنعش إن في ناس قالت إنه كان فعلا من أصحاب المعجزات بس الكلام الكتير ده يلخبط أي واحد
قاطعني وقالي: أعدهم لك ؟
سالته هما ايه
قالي: كراماته. عارف جملة الله الله يا بدوي جاب اليسرى؟؟ سببها ان وهو قاعد في مكانه فك أسرى مصريين في بلاد أوروبا عشان كده الناس هللو له لما جاب الأسرى أو اليسرى زي ما الناس بتقول.
قاطعته قبل ما يعدهم كلهم - وخصوصا ان دي مش معجزة ولا حاجة أكيد الجيش سابهم او هربوا - وقلتله: انت عارف ان ده ساعات بيعتبر شرك؟؟
سأل: هو ايه؟
قلتله: انك تروح تدعي جمب ضريح فلان وقبر علان
قالي في بساطة: انما الأعمال بالنيات. واهو الواحد بيرتاح لما يروح هناك احنا مش بنفكر ف أكتر من كده واحنا لما بندخل الجامع نقعد جوا بنقرأ جواه وندعي نقول يارب مش يا سيدي البدوي اغفر لنا
قلتله بس هو كان بيستخدم الدين في نشر نفوذه، يعني بيستخبى وراه
رد بعصبية وقال: مش للدرجة دي، ده من نسب الرسول (صلى الله عليه وسلم)
استغربت بصراحة أنا أول مرة اعرف كدا سألته مين قال
قالي: مش بقولك عمرك ما دخلت الجامع. الناس كلها بتدخل تقرا اللوح اللي فيها نسب السيد البدوي وبتوصل ف الاخر للرسول صلى الله عليه وسلم، وفي أثر لقدم الرسول جمب مقام سيدي البدوي
طيب قولي انت منين؟
رديت من القاهرة
قالي هما اغلب القاهريين كده مش بيصدقوا حاجة خالص. الدنيا واخداهم
قلتله ليه يا عم انا معاك والله
سألته: بس أكيد في ناس كتير بتكسب من ورا الشيخ البدوي ده وهما ولا ليهم ف الدين أصلا. صح؟
قالي: ياسيدي ناس بتاكل عيش. هو مفيش غير شوية عيال ولاد .... عاوزين يبيعوا مخدرات وقرف ف وسط الزحمة لكن طبعا ربنا مش هيسيبهم عشان بركة سيدي البدوي.
بعدين الناس اللي قالوا انه كان نصاب دول كدابين ومفتريين، ومش ذنب مقامه ان كان في ناس بتنسب نفسها ليه عشان يدخلوا وسط البلد
قلتله يا سيدي ربنا يسامحهم
قالي: مش هما دول بس في ناس تانية بس دول بقى الله اعلم بيهم
سألته: يعني؟
رد: يعني صناديق الندر اللي ف الجامع والله يا سيدي بدون مبالغة بيدخل الصناديق دي مش أقل من 50 ألف ف الشهر بس الله أعلم بيروحوا فين
الجامع لحد دلوقت بيترمم بقاله كتير اوي. يعني مش دلع من العمال ولا حاجة. دول بيقولوا ان الشغل بيخلص أول ما بيبتدي بس لسه مش كل حاجة جاهزة
سألته: طيب الفلوس بتروح فين؟
بص لي كده وفهمت كل حاجة!
قلتله: بس كل اللي بيزوروا الجامع ناس عاوزين سيدي البدوي ولا في طلبة برضه زي اللي بيروحوا الأزهر يدرسوا؟
قالي: لا في طلبة وفي مسؤلين كبار كمان زي السفير الأمريكي اللي محدش بيطيقه هنا وبييجي المولد
قلت في عقل بالي كويس فرصة أهي للولاد بتاع المظاهرات والاخوان كمان - ربنا يستر وميقولوش ان انا صاحب الفكرة بس
طلبت شاي تاني وبصيت ف الموبايل. ولا حاجة... شكلي هطول هنا قلتله بعد إذنك ثواني
كتبت رسالة ع الموبايل ورجعتله تاني سألته: بس انت ليه تصدقوا كل المعجزات دي مش يمكن كلام؟
قالي: لأ مش بس كلام بركاته لسه موجودة... في واحد قريب حاول يسرق صندوق الندر بتاع الجامع واتمسك ف ساعتها ده غير الناس اللي بتيجي تدعي وربنا يستجيب لها
سألته: يعني هما لو دعو برة الجامع ربنا مش هيستجيب لهم؟
قالي: بص هي مش هتفرق بس في ناس بتستريح نفسيا هنا
كنت عاوز اقول حاجة وسكت حبة عشان اكتمها جوايا يعني الموضوع كله راحة نفسية عشان هو ارتبط جوا الناس بالبركة والمعجزات. الموضوع نفسي وإيحاء داخلي بس مش هينفع أقول كدا
سكت وكنت زهقت أصلا طلبت شاي تاني وبصيت على رسالة جتلي ع الموبايل خنقتني. مش هوا دا اللي انا قاعد مستنيه استأذنت الراجل وقمت قرفان ونويت أروح البيت لان شكلها بايظة بايظة
بس برضه نويت أعمل شوية سيرش على جوجل عنه، أهو الواحد يعرف شوية زيادة عن السيد البدوي لان شكلها مش أخر مرة أنزل طنطا شكلي هنزل تاني ومش كل مرة هرجع كدا
أظن الكلام واضح مش أخر مرة ... هه