الثلاثاء، سبتمبر 12، 2006

i'm bored - زهقت

*حاجة حلوة خالص ان الواحد يكتب مذكراته و بعد كده يترجمها*
.....و الله يا جماعة انا زهقت و جبت جاز كمان
الواحد مبقاش عارف فين الصح و فين الغلط - و مش عايز واحد يطلع يقوللى ان الفرق بينهم واضح
!!ما انا عارف انه واضح لكن المصيبة انك تبقى مقتنع بالغلط
اليومين اللي فاتوا، او السنتين اللي فاتوا عملت حاجة مهببة كتيييير - و خصوصا السنة ديه
و عملت حاجات حلوة بس قليلة جدا
طبعا مش هقول كل الحاجات المنيلة عشان المظهر العام بتاعي
خلينا في الحاجات الحلوة دلوقت
عملت لنفسي موقع - ايه العظمة ديه يا واد - ما أي كلب عنده موقع دلوقتي
لأ، انا اقصد موقع بجد، او ع الاقل انا شايفه كده
انا ياما صممت مواقع لكن عمرها ما خرجت بره الهارد
و ياما اشتركت في مواقع لكن عمري ما حطيت فيها حاجة
المرة ديه عملت موقع و عليه كونتينت يهبل - محتوي يعني
و اظن ان انتوا شفتوا بنفسكوا التظبيط اللي انا عملته، اللي مش متابع يبص هنا و ييجي تاني بسرعة
كتبت بجد و نشرت الغسيل..قصدي الكتابات كمان، و الله انجاز - ان جاز القول ههههييييي
رايق انا مش كده ؟؟
تقدروا تقولوا اني هيّست خلاص من الخنقة..... الاحوال المادية معقولة شوية لكن الاحوال التانية زبالة
عمال اخس - و الله بجد - و شعري بيقع و الدكتور قاللى حالة نفسية
ده كله الا الدكتور ده - رحت لدكتور عشان اشوف مالى ؟ بيغمى عليه و ببقى تعبان على طول - محدش يستظرف
و بعد اما عملت التحاليل، و طلع عيني عشان اوديهاله - مشوار من عين شمس لمصر الجديدة في 6 ساعات مرورا بزهراء مدينة نصر!! - هبقي اقولكو ازاي جت ديه بعدين - الدكتور بص لي و قاللي : "انت صحتك احسن مني" طبعا مسكت نفسي عشان مقولوش خمسة و خميسة في عينك دكتور، "انت شكلك عندك مشكلة نفسية و غالبا عاطفية"
.............هاهاهاهاهاهاهاهاهاها
!!طيب اوي الراجل ده
مشكلة عاطفية ؟؟ انا اللي قعدت ماشي شهرين مع واحدة - مرتين × الاسبوع، و مقولتلهاش كلمتين على بعض غير "الله يرحمه جدها، اكيد كانت بتحبه" هاهاهاهاهاها - اصل كان في واحدة معانا في الدرس جدها مات
المهم الدكتور فقعني طبعا
!!شايف ناس قاعدة بتغمز، حقكوا ما انتو تعرفو اللي محدش يعرفه
لكن انا خلاص نسيت و هكبر دماغي ف يا ريت تشيلوني من دماغكو
بكلم مين؟... و انت مالك انت دول جماعة اصحابي، و بيتهيأ لي حتى مش بيعرفو يقروا
النهاردة انا نزلت حاجات جامدة من النت - طبعا و انت وراك غيره؟
و ظبطت حاجات في الشغل، على فكرة انا شغال في شركة اسمها ايه أى اس في مدينة نصر
و من الحاجات اللي انا قريتها هكتبلكو موضوع يجنن محدش كتب عنه قبل كده
و اتأكدت بنفسي - يعني هيبقى سبق تدويني
مستغربين ليه ؟ ما هو الموقع اللي انتوا بتقروه ده اسمه مدونة او بلوج
يا ريت يا جماعة اي حد يسيب اي تعليق عشان محسش اني بكلم نفسي
!!و يا ريتها بتسمع

هناك تعليقان (2):

  1. علي أبوطالبسبتمبر 13, 2006 1:49 م

    عاجبني أسلوبك في الكتابة
    تلقائي وبسيط أوي
    باحاول أكون زيك

    استعن بالله وان شاء الله تكون احسن

    ردحذف
  2. شكرا أوي يا أستاذ أبوطال، على فكرة الموقع بتاعك جامد برضه

    ردحذف

فضلا اترك تعليقك أو أكتب طلبك هنا، مع الحفاظ على أدب الحوار، واكتب اسمك من فضلك....