السبت، يونيو 21، 2008

تنويه هام بخصوص بياناتي

مش عارف ليه كل اللي يشوف رقم موبيلي في الموقع أو ايميلي يفهم اني عامله للبنات بس أو للتفاهة وبس. مع ان العكس صحيح تماما.
اولا: انا ليه مش خايف من الحكاية دي؟
لان انا اصلا رقمي موجود من زمان على النت. من أيام ما كنت عضو مشارك في مجموعة لينكس القاهرة وكنت محتاج كل الناس توصلي بسهولة. كنت بحط رقمي بعد كل دعوة للاجتماع عشان اللي ميعرفش يوصل يتصل على طول وساعات والله - أيام العز - كنت بتصل بكل رقم يرن لي كمان.
بالتالي انت لو عملت بخث عن رقم موبيلي على جوجل - - هتلاقيه على النت بقاله أكتر من 3 سنين، يعني الموضوع مش جديد عليا

ثانيا: انا فعلا حطيته لكل محتاج مساعدة
يمكن ناس تستغرب الكلام دا، لكن اللي عارفني بجد، عارفين اني عمري ما تأخرت على حد حتى لو معرفوش.
بجد انا ببقي فرحان لما حد يكلمني ويقولي
محتاج كذا أو كذا بتصرف على طول على قد ما أقدر.
يعني في موضوع كورسات الجامعة الامريكية اتصل بيا أكتر من 40 واحد منهم اللي كان بيشكر ومنهم اللي كان محتاج مساعدة بسيطة، وكنت دايما بعرض على اي حد اني أنسخله الاسطوانات بنفسي وأقابله بيها. يعني عبد الإله اتصل بيا من السعودية مخصوص يتاكد من الروابط ويشكرني. الموضوع دا كان بيفرحني جدا.
وأستاذ هيثم اللي اتصل بيا مخصوص عشان لقي اللينكات مش شغالة والحمد لله في خلال ساعتين كنت رفعتهم على رابط دائم مخصوص عشانه ومتاح للكل طبعا.
ومعتز طالب طب اللي بعتلي رسالة مخصوص يشكرني على الحلقات بتاعة معجزات في الرحم. والناس اللي بعتتلي رسايل الفجر كمان والله فرحت بيها جدا مع اني صحيت من النوم مخصوص.
واللي كلموني عشان اسطوانات الإندزاين العربي أو الكوارك بتاع الماكنتوش من قطر وبلاد أجنبية كمان وكان ليهم طلبات تانية حاولت أوفرها.
ومسلسل فريندز اللي عرفني على ناس كتيرة جد برضه وطلع منهم ناس معايا في الكلية بتاعتي!!!! ومعرفناش بعض الا على النت صدفة!
وكل اللي سألوا عن حاجة في موضوع برامج النوكيا الجيل الثالث والله رحبت بالكل
وكتير اتصلو عشان أفلام انا حاططها أو هما عاوزينها
وكورس تعليم الكمبيوتر كمان جابلي مكالمات كتير غلط، مش عشان انا مش عاوزها لا عشان هو مش بتاعي ووجهتهم كلهم للمهندس صاحب الكورس
واسطوانة ريدلر اللي اتفاجات انها انتشرت مع ناس اعرفهم نزلوها من النت من غير ما يعرفو ان أنا
محركات البحث برضه كان من المواضيع اللي خلت ناس كتير تتصل تسأل على معلومات أكتر ومعتقدش اتأخرت عليهم
موضوع ازاي تنتقم من الناس بجد دا اللي عمري ما هنساه لأسباب لا يعرفها إلا شخص واحد فقط. استقبلت برضه اتصالات كتير بسببه، وكان منها حاجات تودي في داهية!
مش هقدر اقول الكل طبعا لكن انا بس بقول أمثلة بس عشان الناس تفهم اكتر
وكمان انا فعلا عملت صداقات حلوة مع ناس فعلا كويسين عن طريق مساعدتهم ومازلت بقول انا دايما في الخدمة.

ثالثا: ليه بقي الناس فاكراني بلعب؟
يعني مثلا الشات بوكس اللي في الجمب لقيته فجاة مليان هو انت مرتبط وواحدة ترد وتقول لا مش مرتبط وواحدة تدخل وتقول مخطوب ولا لأ؟ هو عمر حد قرأ تحت توقيعي في أي منتدى كلمة الإضافة للبنات فقط؟ لا والله عمري.
الغريب ان في واحد انا فعلا زعلت منه اتصل بيا من ليبيا وغير صوته على أنه بنت عشان أساعده. ومش فاهم ليه عمل كدا؟ هو بس تخيل اني هساعده لما يكون بنت ولو راجل لأ؟ عيب والله. طبعا عملت له اللي هو عاوزه مع اني اتضايقت من الموقف نفسه.
الغريب ان كذا واحد برضه يفتكرو اني حاطط رقم بنت عاوز أأذيها على النت عشان اللي يدخل يتصل ويضايقها. كمان!!!!
دا رقمي يا جماعة وانا حطيته لكل اللي محتاجني: في شغل أو مساعدة.
ياريت يكون الموضوع واضح

وانا فعلا بعتز بكل اتصال أو مساعدة أقدر أقدمها لحد.


Read more - باقي الموضوع

السبت، يونيو 14، 2008

استلمت شغلي رسميًا

الحمد لله استلمت شغلي رسميًا وأصبحت أصغر مدير سجن ... قصدي أصغر مدير تسويق في تاريخ البشرية.
ادعولي

Read more - باقي الموضوع

الخميس، يونيو 05، 2008

أسف على التأخير

كنت قلت هنا ان فاضل لي يومين بس وأحط المقال

الحماية من برامج مراقبة الكمبيوتر ولوحة المفاتيح

معلش ظروف خارجة عن إرادتي والله - غالبا فاضل يوم واحد
أسفي لمدير ISSA في مصر ومايكل سيس ومحرر ISSA بالفرع الرئيسي

Read more - باقي الموضوع

الأحد، يونيو 01، 2008

حمل كتاب "عشان ماتنضربش على قفاك" كامل 231 صفحة

بأسلوب بسيط وبطريقة السؤال والجواب، كتب ضابط الشرطة السابق عمر عفيفى "عشان ماتنضربش على قفاك"!، فى سبيل توعية المواطنين بحقوقهم. ومالبث ان طرح المكتاب، الا وصادرته وزارة الداخلية. وبعد مطارادت امنية لعفيفى، قرر مغادرة البلادالى الولايات المتحدة.

www.RiddleR.co.nr

ازاي تتصرف في اي موقف ممكن يحصلك مع الشرطة في اي وقت واي مكان؟ وعشان محدش يلهف حقوقك لازم تعرفها الاول وتعرف ايه ليك وايه عليك والحق ميزعلش.
دي كانت الاسطر الاولى من كتاب عشان ما تنضربش على قفاك لضابط الشرطة السابق المقدم عمر عفيفي.
الكاتب بيقول ان الحق ميزعلش..لكن يبدو انه بيزعل وزارة الداخلية لانه قامت بمصادرة الكتاب من المكتبات. بعد اسابيع من نزوله الاسواق.. كأنها حاجة ابيحة ان الناس تعرف حقوقها !!
الكتاب كان قد تم نشر بضع صفحات منه على الانترنت حوالي 15 صفحة.. الى ان قام احدهم برفع الكتاب كامل على السكانر وهو حوالي 230 صفحة.
الكتاب فعلا مهم جدا.. ومكتوب باسلوب بسيط وسهل بدون الدخول في تفاصيل دستورية او قانونية.
شكرا للكاتب عمر عفيفي.. وشكرا لمن قام بتوفير النسخة الالكترونية للكتاب.
www.RiddleR.co.nr

أصدر ضابط شرطة سابق كتابا جديدا يشرح فيه للمواطن المصري حقوقه عندما يتعامل مع رجال الامن وكيف يمنعهم من اهانته والتعدي عليه.
ويقول المقدم عمر عفيفي إن خبرته وطول فترة عمله في الوزارة كانا دافعا له لإصدار كتاب في صيغة سؤال وجواب يشرح فيه للمواطن البسيط حقوقه وواجباته، ويعرفه بمصطلحات كثيرة يجهلها مثل الفرق بين التحري والكمين وإذن التفتيش، ومن يجوز له تفتيش سيارته أو زوجته تفتيشا ذاتيا وكيف يمكن أن يشكو ضابطا عذبه أو لفق له تهمة.
ويشير في كتابه والذي جاء تحت عنوان "عشان ما تنضربش علي قفاك" انه لم يكن راضيا عن الأوضاع داخل الوزارة والطريقة التي يعاملون بها المواطن، والضغوط التي يمارسها الرؤساء علي الضباط، فاستقال وعمل محاميا ومدربا في مجال حقوق الإنسان.
ويؤكد عمر أنه طوال فترة عمله في الوزارة لم يعذب مواطنا ولا صفعه أو أهانه، لأن قوة القانون أكبر من قبضة أمناء الشرطة.
ويضيف: يلجأ الضباط إلي هذه الأساليب بسبب ضعف إجراءاتهم القانونية وضغوط رؤسائهم والرغبة في الترقية، كما أنه كلما ازدادت المناطق فقرا ازدادت انتهاكات الضباط للمواطنين، حسبما ذكرت جريدة المصري اليوم.
عفيفي استغرق ثلاث سنوات في الإعداد لهذا الكتاب الذي يمثل تلخيصا لقوانين الإجراءات والعقوبات والشرطة والمرور والآداب، ويتمني أن يشتريه المواطن البسيط.
ويستطرد: عمل الشرطة قائم علي جهل الناس بالقانون، وهو جهل متعمد، لأن الوزارة لا تنظم حملات توعية سوي لتعريف المواطن بواجباته دون حقوقه، مما خلق نوعا من التوتر بين الشرطة والشعب، ويجب علي الوزير أن يطبع كتابي علي نفقة الوزارة ويوزعه بأسعار رمزية علي جميع فئات الشعب، وذلك لتعريفهم بحقوقهم قبل مطالبتهم بالواجبات.
كما يشار إلى أن عفيفي قد تدرج من العمل كضابط في مباحث المخدرات ومكافحة جرائم النشل والأمن المركزي والمرور، إلى أن أصبح مأمورا لسجن الإدارة العامة للمباحث.. في رحلة طويلة استغرقت 20 سنة من العمل في وزارة الداخلية، وانتهى الامر بالجل إلى تقديمه طلب إحالة إلي المعاش بسبب إصابة عمل.
www.RiddleR.co.nr


الكتاب: "عشان ماتنضربش على قفاك" والغلاف يمكن تحميلهم من هنا
حمل الكتاب نسخة كاملة 231 صفحة

Read more - باقي الموضوع